أنا وأخي عوض على ضيف الله الطلحي

درة ثمينه موجهة من أخي الشاعر
عوض على ضيف الله الطلحي
وردي المتواضع عليها

انا اللي كنت ابا الغربه وانا اللي كنت ابا اسافر= نسيت ان الحقايق غير عن حلمي وانا راقد
واثر درب الشقا ماينتهي ماللطريق آخر= شردت وشلت مابين الضلوع اللي عنه شارد
من اول يوم للرحله تهدم قصري العامر= وصرت ابحث وادور بس مادري ويش انا فاقد
زمان المعجزات اقفى ووقت خرافة الساحر= ولا فانوس سحري لامسحته جاني المارد
حقايق بعد بانت وانكشف لي حضي العاثر= عرفت النعمه اللي يوم انا فيها لها جاحد
ليا امسى الليل واليا الدار قفرى وين ابو ناصر= وجوده كان اذا جار الزمان البلسم البارد
بكلمه طيبه وبراي صايب يشرح الخاطر= ليا جيته يصدر هم قبل اسمع منه وارد
عساه يطول عمره واغترف من بحره الزاخر= واعود في جواره واستنير برايه الراشد
ولا ادري ابكي على اللي راح والا ابكي من الحاضر= دموع العين انا معذور لو هليتها واجد
وانا احس ان قلبي منشبك في ريشة الطاير= ليا حرك جناحه خفت يطرح ريشه الزايد

وهذا ردي

في امان الله ياذيباً تلج عواك ومهاجر=ولوني كاره الفرقى وعارف جرحها الكايد
تولم للرحيل وخذ قصيده من فم الشاعر= معك ذكرى ومعناها على مافي الخفا شاهد
وانا بصبر وربك مايضيع محتسب صابر= ولا بشكي ولا ببكي ولا بحتج واعاند
وانا ياكم نصحتك ماسمعت الشور وتكابر= ولا شك انها صابتك نظرة عين من حاسد
وخبرتك عن الغربه وتدري اني بها خابر= ولكن حضك الغادي مع الضدات متواعد
وعلمتك عن الدنيا من الاول ليا الاخر= وكنت ذراعي اليمنى وكنت تعين وتساعد
وانا جنبك كما جنبك ليا كان الزمن جاير= ولا منك فقدت الجنب طاح الكف والساعد
وما دام القدر حاكم عليك تشد وتغادر= تحذر واحفظ الاسرار لاتأمن ولا واحد
لو ان الذيب مايقدر عليه الثعلب الماكر= لكن الوقت متغير وحنا في زمن فاسد